Tíðindi

Í morgin verða nýggju ljóðdempandi hurðarnar loksins uppsettar í nýggju musikkstovunum í Vágs Skúla. Harvið fær Suðuroyar Musikkskúli trý nýggj, góð undirvísingarhøli í Vági. So nú ber aftur til hjá okkum at hava vanliga undirvísing við fleiri næmingum í senn í Vági frá og við mánadegnum 11. september. Verið vælkomin í nýggju, snotiligu hølini í Vági!

Vegna Suðuroyar Musikkskúla
Kári Jacobsen, leiðari

So er summarfrítíðin liðin, og vit vóna at tit hava havt eitt gott summar. Eitt nýtt musikkskúlaár stendur fyri durum.

Lærarar okkara seta seg sjálvir í samband við hvønn einstakan næming, og kunna teir um nær og hvar teir skulu møta til undirvísing hetta skúlaárið. Onkrir lærarar byrja hesa vikuna, aðrir í næstu viku.

Í Vági eru nýggju hølini í Vágs Skúla ikki heilt til reiðar at taka í nýtslu enn, men um 1-2 vikur skuldi verið klárt.Tað merkir at undirvísingin í Vági byrjar umleið 1. september. Tit frætta nærri um hetta.

Vit eru fegin um at kunna bjóða tveimum nýggjum lærarum vælkomnum í ár. Tað eru Ari Bjarkason, sum fer at undirvísa í træblástri og Tróndur Enni, sum fer at undirvísa í messingblástri.

Kunnandi foreldrafundur fyri øllum foreldrum/avvarðandi at næmingum á Suðuroyar Musikkskúla verður væntandi í fyrstu viku í september, tá frálæran er byrja allastaðni. Tíð og stað verður lýst seinni.

Vit gleða okkum at síggja næmingarnar aftur!

Við tónleikakvøðu og vegna Suðuroyar Musikkskúla
Kári Jacobsen, leiðari

160 fólk til konsert á Seglloftinum

Umleið 160 fólk høvdu leitað sær innar í Seglloftið í síðstu viku, tá ið Suðuroyar Musikkskúli helt árligu summarkonsert sína. Hópin av royndum og minni royndum næmingum vóru ófør og djørv at framføra, og áhoyrarnir sótu hugtiknir og lýddu á.

Aftaná var borðreitt við trý-rættirs matskrá, har høvi var hjá foreldrum, næmingum og lærarum at práta og hugna sær saman. Vælvitjaða og hugnaliga summarkonsertin hjá Suðuroyar Musikkskúla við mati aftaná, er við at gerast ein siðvenja, har tað í stórum legst afturat við luttakarum ár undan ári. 

Hjartans tøkk allir tit fittu og dugnaligu næmingar, sum framførdu so lystiliga, og takk til øll tykkum mongu sum komu at lýða á!

Týsdagin 30. mei kl 17 verður summarkonsert hjá Suðuroyar Musikkskúla á Seglloftinum! 🙂 Okkara dugnaligu og hugagóðu næmingar fara at spæla fyri okkum, og aftaná verður hugni við nátturða og samveru millum næmingar, foreldur og lærarar. Tað er neyðugt at siga frá um mann ynskir at eta við, so vit vita hvussu nógvur matur skal gerast. Send eini boð á tlf 22 33 42 ella eitt teldubræv til sumusikk@gmail.com, og skriva nøvnini á teimum sum koma. Vit gleða okkum at síggja tykkum, møtið fjølment! 

Fríggjakvøldið hevði Yngra Orkestur á Suðuroyar Musikkskúla, undir leiðslu av Johan Hentze, konsert saman við Tvøroyrar Hornorkestri á Seglloftinum. Heilt fitt at fólki høvdu leitað sær oman á Seglloftið til hesa hugnaligu løtuna. Okkara hugagóðu næmingar høvdu vant meginpartin av degnum. Hildu væluppibornan pizza-steðg og so aftur at venja. Tey hepnaðust væl við framførsluni, og fagnaðurin var stórur. Takk fyri øll somul, bæði tit sum framførdu og tit sum komu at líða á. Og ikki minst takka vit Tvøroyrar Hornorkestri, undir leiðslu av Tróndi Enni, fyri gott samstarv.

Nakrir av gittarnæmingunum hjá Bo Isholm framførdu á einari lítlari konsert í Framtíðini í Vági í síðsta mánað. Fleiri teirra hava ikki gingið so leingi til gittar, og vóru óførir at bæði framføra sjálvir og spæla saman við øðrum. Ein hugnalig løta hjá næmingum og foreldrum.

 

 

 

Gittar- og klavernæmingar úr Suðuroyar Musikkskúla framførdu so lystiliga í Hvalbiar Skúla í síðstu viku. Skúlin helt eina evnisviku, sum nevndist Utopia, har næmingarnir sluppu at royna vaksnamannalívið, tí skúlastovurnar vóru gjørdur um til bankar, matstovur og annað. Eitt læruríkt og frálíkt tiltak.

 

 

 

 

musikkskulin

Suðuroyar Musikkskúli ger vart við, at í løtuni eru tøk pláss til næmingar í hesum ljóðførum: Gittar, tvørfloyta, klarinett, trombone, saksofon, trumpet, kornet, althorn, baryton, euphonium, tuba.

Meira fæst at vita á heimasíðuni sumus.fo, har tilmelding eisini fer fram.

Suðuroyar Musikkskúli hevði eina stak hugnaliga og væleyðnaða jólakonsert í skúlanum í Trongisvági 6. desember. Okkara óføru næmingar spældu jólasangir av ymsum slagi, bæði sum solistar og í bólkum. Eisini áhoyrarnir fingu brúkt røddina í felagssangunum og aftaná var jólahugni við kaffi og køkum. Hjartans takk øll tit mongu sum komu at líða á, hjálpa til og syngja við, og ikki minst takk til okkara dugnaligu næmingar sum vóru røsk og fitt í allar mátar! 🙂

Fimm óførir næmingar og lærarar teirra framførdu ljómandi blásaratónleik í Sumba í dag, tá minnisvarði teirra sjólatnu varð vígdur og avdúkaður. Eitt hugnaligt og væleyðnað tiltak.

img_4556

img_4559

img_4563

img_4567

12